კოლექციის შესახებ

დავით კაკაბაძე, დიდი ქართველი მოდერნისტი - ფერმწერი, გრაფიკოსი, თეატრის და კინოს მხატვარი, გამომგონებელი და ხელოვნების თეორეტიკოსი. სწავლობდა პეტერბურგის უნივერსიტეტის ფიზიკა-მათემატიკის ფაკულტეტზე, პარალელურად მეცადინეობდა მხატვარ-აკადემიკოსის ლევ დმიტრიევ-კავკაზსკის სახელოსნოში 1910-15 წლებში. 1919 - 27 წლებში მოღვაწეობდა პარიზში, სადაც ქმნიდა სრულიად ორიგინალურ კუბისტურ, აბსტრაქტულ და კონსტრუქციულ-დეკორატიულ კომპოზიციებს. მონაწილეობდა მოდერნისტული ხელოვნების საერთაშორისო გამოფენებში პარიზში, ბრიუსელში, ნიუ-იორკში და სხვ.

იმერეთის პეიზაჟის თემა ლაიტმოტივად  გასდევს  დ. კაკაბაძის მთელ შემოქმედებას. ციკლის ამ ორ ადრეულ ნიმუშში  ნათლად იკითხება მკაფიო  ინდივიდუალობის მქონე მხატვრის შემოქმედებითი სახე. პეტერბურგის უნივერსიტეტის სტუდენტი დ. კაკაბაძე, არდადეგების პერიოდში ნატურიდან ხატავდა მშობლიური კუთხის პეიზაჟებს, სადაც ბუნების უშუალოდ რეალისტური ასახვის ნაცვლად მის ხატოვან განზოგადებას მიმართავს. პანორამული, ზემოდან დანახული სივრცე, დეკორატიულ-სიბრტყობრივი კომპოზიცია, ლოკალური ფერადოვანი ლაქებით შექმნილი “მოზაიკური” ნახატი, ის ძირითადი გამომსახველობითი თვისებებია, რითაც დ. კაკაბაძე ემოციურობით აღსავსე აბსტრაჰირებულ სურათ-ხატებს ქმნიდა.

გაზიარება