კოლექციის შესახებ

დიმიტრი ერისთავი - გრაფიკოსი, ილუსტრატორი, კინოს მხატვარი.  XX საუკუნის მეორე ნახევრის ქართული მხატვრობის ერთ-ერთი მნიშვნელოვანი წარმომადგენელი.  სწავლობდა თბილისის სამხატვრო აკადემიის სახვითი ხელოვნების ფაკულტეტზე გრაფიკის სპეციალობით გამოჩენილი მხატვრების იოსებ შარლემანის, ლადო გრიგოლიას, სერგო ქობულაძის ხელმძღვანელობით (1950-56). საქართველოს სახალხო მხატვარი (1985), შოთა რუსთაველის სახელობის სახელმწიფო პრემიის ლაურეატი (2006). მუშაობდა პორტრეტის და ნიუს ჟანრში, ქმნიდა მრავალფეროვან ყოფით კომპოზიციებს.

წარმოდგენილ ჟანრულ სცენაში სამი პერსონაჟი მუზიცირებს - ქალები ჩელოზე და ვიოლინოზე უკრავენ, ბიჭი სალამურს აკვნესებს. ისინი თითქოს მელოდიურ ჰანგებს გამოსცემენ და  მუსიკით ავსებენ სივრცეს. ნამუშევრის ერთ-ერთ მთავარ გამომსახველობით   ხერხს პლასტიკური ხაზი წარმოადგენს, რომელიც შემოწერს მოცულობით ფორმას, რასაც  კომპოზიციაში დინამიკა და რიტმი შემოაქვს. დახვეწილი ფერადოვნება, მკაფიო  ნახატი, შუქ-ჩრდილის კონტრასტული მონაცვლეობა სურათს ესთეტიკურ იერს, ავტორისათვის ჩვეულ პოეტურ, ლირიკულ განწყობილებას ანიჭებს.

გაზიარება